Indisen Baptist Arogo nung teintet rogotem atema sentong agi

Dimapur, Oct. 4 (TYO) : Indisen Baptist Arogo, Dimapur nung Women ministry-i ketdangsüa teintet rogo (Senior Citizen) atema anogo ka rajemshi shisa tokden agi aser Deobarnü sentong nung tongti O jembir Rev. Lima Jamir, Pastor Kümlong Baptist Arogo, Mokokchung-i “Tsüngrem O nung terenemtet taküm” (Yer. 17: 7 – 8) Omen nung amendaker teintet rogo 70 shi adenshia sentong kanga takok nung agitetogo.
Tongtipangsa O jembir-i teintet rogotem dang ayongzükba mapang, “kechiba nenok dang teintet rogo ta ajar? Iba ya nenok taküm nung küm 60, 70, 80, etc.. asüba agi ajar masü, küm aika asüba agi tambur aser tantsür ta nenok dang tanü alimai ajar masü. Saka nenok ya shisatsü nung teintet, taküm mapa nung teintet, taküm nung lanur dang nungi jembiba aser mapa nung ajangshiba ajak nung teintet, taküm shi nung teintet, ajangshiba nung teintet aser tanela taküm nung teintet, iba yongji nenok dang elderly ta masü saka Senior Citizen ta alimai ajabaji lir.” ta ashi.
“Anungji, na teintet rogo ka süa alidang Arogo nübur atema aser alima atema kechi inyaktsütsü ta bilema Tsüngrem dang taochi meshia alitsü tongtipang” ta Rev. Lima Jamir-isa ayongzük.
Iba sentong takok ngua agitetba asoshi Rev. Lima Jamir Pastor aser Kümlong Baptist Arogo, Mokokchung dang kanga pelar, ta IBAD Women Ministry nung Asso. Pastor (W), Mrs. Asangla Pongen aser, Secretary, Mrs. Temsüla nati külem sangdong ka nung metetdaktsü.