IGNOU-i memunoi RTI atema certificate, diploma course agütsütsü

New Delhi, October 4 (Agencies): Tanü asüng tensa nung Right to Information Act (RTI) kanga nüngdakba reprangteta Indira Gandhi National Open University (IGNOU)-i RTI nung certificate aser diploma course agütsütsü lemtetogo.
Iba course nung Central Information Commission (CIC)-i nüngita yaritsü aser Central Government nung inyaker ajak agitsüsa akümtsü.
“Nüburtemi RTI ajanga nüngdakba osang nguteter ta onoki meteta lir saka iba dak sentakba nung technical mapatem telung tonga ia memetet. RTI ajanga nüngdakba osang bushidang koma tenzüktsü, tasüngdangba koma asüngdangtsü, kodang aser kechi nung oa mepishitsü itemji ano jangja memetetba pur aika lir,” ta IGNOU Vice Chancellor Nageshwar Rao-i PTI dang ashi.
“Anungji tang tensai aginüba ama onoki CIC commissioner den ajurutepa iba course nung nungittsü asüngdangogo,” ta pai shisem.
IGNOU, Social Sciences reju nung Public Administration tsütsü ketdangsertem den CIC nung mongintemi iba course nung tesayuba peria agütsüdar.
Certificate course ji 2016, July ita nungi tenzüktsü imlar aser diploma course bo 2017, January ita nungi ang tenzüktsü sentong lir. Küm nung course shisa atema admission anabenben lapoktsütsü.
Post Graduate Diploma in Right to Information (PGDRTI) atemabo inyakyim tejangja lateta lir saka certificate course atemabo ano tang teinyakdak lir.
“Central Government nung inyaker ajak iba ya agitsüsa akümtsü aser tepuokdak alir den nübur taginer ajaki item course agitettsü,” ta Rao-i ashi.