Olulu jembiba anema Victoria Beckham-i ola adokogo

October 07, 2015: Kentener aser fashion designer, Victoria Beckham aser la kinungbu David Beckham na tesentaktep nung timtem lir ta tawa olulu jembiba mapang ka nung Victoria-i, parnoki (olulu prokertem) kuli sayutsü kecha mali, ta ashi.
Arishi küm 41 Victoria-i, tena pei nüngdak balala nung kanga masüngi aliyonga, tena kibong kümer küm 16 nung tang tashitaitba lir ta jembiba osang Daily Mirror ajanga metetdaktsü.
“Jangratemtsü kinungbu ka aser tebur tajung den pelaa aliba tanurtem kü em moatsüogo. Atangji, küna pei pei nüngdak aser charity atema ainlen kanga senzür, saka apuani ka aser kibong ka ama kati ka atema mapang agütsüteter. Iba dak alia David künati kuli agütsütsüsa mali,” ta Victoria-i ashi.
“Küna kati ka meimer, küna kati ka anepalur aser apuani den tsürabur ka ama tashi itta lir,” ta lai ashi.
David tena chirtemji- arishi küm 16 jabaso Brooklyn, Romeo (13), Cruz (10) aser arishi küm 4 jala Harper lir.