Tripura nung sorkar doctor temi nija mapa meinyaktsü

Agartala, July 12 (Agencies) : Honibarnü Tripura sorkari state health service nung inyakba doctor tem shinga nija mapa meinyaktsü tetuyuba agütsüogo.

Ajisüaka, iba tetuyuba nung general practitioners aser medical colleges nung tesayurtem madener.

Tripura kübok sub-division balala nung administrative ketdangser nisung 70 shi ka nija mapa inyaktsü noktanger, ta Tripura health service director, J K Dev Barman-i ashi.

Item ketdangsertem nija mapa inyaktsü melena parnok itasen nung shilem 10 enoksemtsütsü aser tanga doctor tem nem sen 1,000 non-practising allowance (NPA) ta ser agütsütsü, ta Dev Barman-isa metetdaktsü.

“Ajisüaka sorkari lapokba mozüki aser college tem nung nija doctor kar jurila inyakba atema telemtetba magi. Sorkar doctor temi parnok itasen nung shilem 25 talila enoksemer agüjang ta takhangba agütsür” ta paisa shisem.

Sorkar mozükitem nung inyakba doctor temi ozüng anema parnok indang private chambers nungang mapang agütsür ta aitsür.

Taoba ita high court-i sorkar doctor temi nija mapa inyakba atema tenokdangba kar agütsüba sülen parnok nem sen 1,000 talila agütsütsü telemtetba agi, ta Dev Barman-isa shisem.

“Media osang ka ajanga sorkar mozüki nung doctor temi ozüng anema inyakba metetdaktsüba nung ajemdaker Tripura high court-i iba onük asoshi tetuyuba kar agütsü. Okadakisa state sorkar dang August 17 matongdang parnoki asüngdangba kar atema telangzüba agütsütsü tetuyuba agütsüogo” ta paisa metetdaktsü.