Dimapur nung post office yanglutsü atema Union Minister-i lung azüngtsüogo

Dimapur, July 12 (TYO) : Deobarnü Information & Technology, Communications minister, Ravi Shankar Prasad-i Agartala nungi video conference ajanga Dimapur Mukhya Dak Ghar lung azüngtsüogo.
Dimapur East Police station anasa Post office tejenba kimung nung Director of Postal Services, Nagaland, Som Kamei-i tezüluba sayatsü.
Nagaland nung sub post office 42 aser branch office 287 lapoka lir. Tang tashi nung Kohima head post office nung dang core banking facility lir saka taruba ita asem tsüngda post office asem nung core banking facility tenzüktsü aser küm tatemlen tashi nung district post office ajak nung core banking tenzüktsü sentong lir, ta Kamei-i metetdaktsü.
Nagaland nung shishilembadak tongtiba asüba agi Kohima head office dang nungibo Dimapur nungang mapa timba inyaker. Iba jagi Dimapur nung office tongti ka alitsü nüngdaker. Tang yanglutsü aliba office kiji azüklen menden asem atongtepa atutsü aser küm ana tsüngda yangluzüktsü sentong lir, ta paisa ashi.
Union Ministry-i Nagaland nungi John Angami nem Meghdoot Award agütsü aser iba sempet ya Nagaland state-i tan mezüngbuba atema nguogo. John Angami-i tangar nungi teyari kecha magii dang CBS platform renemba atema iba sempet angu, ta tanü Kamei-isa metetdaktsü.
Postal department-i Indigo den tesentaktep yangluogo aser iba ya ajanga yimti balala nungi osettem yokba Nagaland-i mapang shitak nung bener arutsü, ta paisa shisem.