Kohima nung Leaders Arise seminar ka kaogo

Dimapur, October 09 (TYO): Women Resources Development Department-i October 9, 2015 nü ‘Leaders Arise Motivational’ seminar ka parnok indang conference hall nung kaogo. Iba sentong nung ‘Leaders Arise Nagaland’ ngutetsang aser Overseas Naga Association (ONA), Australia nung ambassador Apostle Rev. Luoliehu Yimsung-i tongti o jembi.
Department nung ketdangpurtem aser staff tem ajungshia teinyaktsütem lemsatepba mapang Rev. Luoliehu Yimsung-i, nisung kaji kechi mapa lemzükdir iba nungji pei jenjang angateta aser pei liro azüoka alitsübaji kanga nüngdak, ta ashi.
Paisa ashiba agi, asen lokti nung tang tebilemba aser shisatsü tajung aketba nübur kanga nüngdaka kümogo aser nüburtem tensa tasak ajuruba mapang lennirtemi teimla agütsütsüla.
Tang ama anogo shi melenshia ainba lima ka nung meimchir ka taküm nung teti teimla nüngdaker. Iba den külemi nükjidong makai jajartema asenoki metokshitsüla kechiba süra parnokjia asen lokti nung nüngdakba purtem lir. Asenoki parnok nem tetuyuba tajung den teimla aser tasü aittsü lenmang lemsateptsüla, ta paisa ashi.
Sentepa alirtem dang azü mesen mesüi inyaktsü, mapang amshitsü aser pei tebilemba melenshiba angatettsü atema tayongzükba agutsüdang pai, asen lokti nung tebilemba tajung agi kanga anünger anungji ibaji reloktsü merangtsüla, ta shisem.
Iba sentong nung mendenji Deputy Director, Vilone Sakhrie liasü.