Angatetta inyakba T. Ken (T. Ken 119:113-128)

“Ni ne tenzüker lir, kü nem tangatetba kua, angji ni Ne temelaba ozüng metettsü akoktsü”  (T. Ken 119:125).
Aiben sayutsüngiri tangatetba maka sür amangtsü ashir, saka Tsüngremi tangatetba nung asenoki amangdaktsüner aser tashi angadaktsüner. Asenoki tashi angatsüla, saka kodang ibaji tangatetba nung tashi anga südir iba nungji Tsüngrem pelar.
Ibri 3:7 nung asenoki angur, “Anungji tanü nenoki Tsüngrem ola angashira temulung temerang” (Ibri 3:7-9). Ibri shiti züluri tashi angatsü asoshi ajabaji kuli ana agütsür. Kaji Mosa tamang katetta Tsüngremer kidang kilir ka liasü, aser kaji; Khrista tamang katetba jabaso ka ama Tsüngrem kidang liasü. O ka nung Mosai pa Tsüngrem kidang kilir ka lir aji asünung tamang katetba tashi angabaji akanger ta pai angateta liasü, aser Khrista jabaso ka ama Tebu dang tashi anga. Kasa asenok danga inyaker, kodang asenoki Tsüngremji asen Teyanglur ta angatetdir, asenoki Pa teyangluba ka ama Pa dang tashi angatsü. Kodang Khrista asen chuba kümdaktsüdir asenoki Pa dang tashi angatsü. Paji captain, aser asenok sepoy ka ama tashi angatsü. Paji Kibur aser Tesayur, anungji Pa nütsüng ama asenoki Pa dang tashi angar. Iba yongji Pai mapang ka nung nütsüngtem arütsü, “Kechiba nenoki Kü dang Kibuba, Kibuba ta ajar aser Ni ashiba meinyaker?” (Lk. 6:46). Khrista tekolak süra, asenok Pai temang nung tenük tülen ka ama Pa dang tashi angatsüla. Ibaji tangatetba tashi angaba lir.
Dawid Tsüngrem mulungjang anasa aliba nisung ka liasü, saka iba tetezü Pai kodang tashi mangai mali asü ta masü. Pai aiben Tsüngrem dang tashi mangatsüsa aküm. Iba jagi pai teti Tsüngrem dang sarasadem, “Kü nem tangatetba kua, aser ni Ne ozüng ayutsü, Au, ni kü mulungjang ajak agi aji benshitsü. Ne temelaba ozüng ni angazüktsüsa kü nem tangatetba kua. Ni ne tenzüker lir, kü nem tangatetba kua, angji ni Ne temelaba ozüng metettsü” (T. Ken 119:34, 73b, 125). Au, Tsüngremi asenok nungi mangateti tashi angaba makanger. Angatetta tashi angaba mulungjang nung terataba taklang magütsür.
Kechiba kor, gado aser tanga shirurutemi tashi angatsü asaker: Kechiaser parnok dak tangatetba mali. Iba yongji Tsüngremi asenok dang sayutsü ta ashi (T. Ken 32:8,9).
Kong nungi asenoki shidakji angutsü? Tsüngrem O nungi. Iba yagi asenok telung nisung nem teti tangatetba agütsür. Tsüngrem Oi tejangja ochibaji agütsür. Temeyoktep mali (Ibri 4:11,12). Lai itemi bushiba ajanga asenok tanela meküpraki asen taküm Tsüngrem Tazüokba nung alir.