Mirza o Hingis na China Open final tongogo

Beijing, October 09 (Agencies): India tsür, Sania Mirza aser Switzerland tsür, Martina Hingis nati semifinal asaya akokba sülen tang tasayadak China Open tetsür doubles shilem indang final asayatsü jenjang tanü Hokolbar nü nguogo.
Tang temaba jenjang nung alir Mirza o Hingis nati tanü ghonda 1 ser minute 7 nung points 6-2, 6-3 ngua China tsür, Chen Liang aser Yafan Wang na semifinal nung tsükdaktsü.
2015 Wimbledon aser US Open champions, Mirza o Hingis nati tan agi China Open final 4 benbuba asayatsü jenjang atonga angur lir.
Tebur singles shilem nunga Serbia nunger Novak Djokovic-i America nunger John Isner madak takok ngua semifinal asayatsü jenjang tanü nguogo.
World No. 1 Djokovic-i tanü minute 52 nung points 6-2, 6-2 ngua Isner quarterfinal asaya nung tsükdaktsü.
Djokovic-i Taiwan nunger Lu Yen-hsun madak points 6-3, 6-1 agi takok angusang, Spain nunger David Ferrer den semifinal asayatsü lemzükogo.
World No. 8 Rafael Nadal-ia tanü points 3-6, 6-4, 6-3 ngua America nunger Jack Sock madak quarterfinal asaya akokba osang jangjaogo.
Spain nunger Nadal-i tanü ghonda 2 dak tema asayaba sülen World No. 30 Sock madak takok ngua liasü.