Naga yimten teloktem melongjem tashi saru agitsü temeten mali

Dimapur, July 12 (TYO) : NSCN (IM)-i parnok Naga nungertem atema inyaker ta ashir saka parnoki tang osangkakettem nung sangdongba ajanga ibaji mesayur, ta Against Corruption and Unabated Taxation (ACAUT Nagaland)-i metetdaktsüogo.
Asenoki tesüiba mapangtem meyipa reprangdangra nübortem temeim aser teyari ajanga dang yimten mapa inyakertem takok anguba angutsü. NSCN (IM) ama telok kati saru agitsü atema parnok temeten lir ta ser nisungtem amokmerenba angudang sasa bilemtsür, ta Media cell, ACAUT Nagaland sangdong nung shia lir.
Naga yimten telok 7-8 tashi lir aser parnoki saru sarutsü atema temeten lir ta parnokia kasa kuli agütsür ta NSCN (IM)-i metettsüla. NSCN(IM)-i parnok saru agitsü atema temeten lir ta süra tanga Naga yimten teloktemi parnok temeten lir ta kuli agütsüba nung tasüngdangba arur. Ajisüaka, public-ibo Naga yimten teloktem ka küma melongjem tashi telok shingaia saru agitsü temeten mali ta noktaker.
Nübor khuret atema mebilemtsüi inyakba ajanga nübortemi Naga yimten maparen aser Naga yimten teloktem nungi tali pilatsü, kechiyong saru agiba ajanga shishilembartem dang masü saka Naga nunger ajak akoksar. Naga nungeri telongjem aginüa ola adokba ya Naga yimten teloktemi angashitsüla aser angatettsü asoshi mapang tongogo.
Naga yimten ken o atema inyakba mapa nung nübortem teyari nüngdak ta Naga yimten teloktemi tongtipang süa angatettsüla, aser iba nung ajemdaker lokti tentettem amokmerenba inyakyim anentsüla. Naga nunger tongti teloktem ajak longjemer Naga yimten teloktem dang ka küma longjemtsü ayongzüker aser iba temepishiba magizükra Naga yimten ken o atema inyakba otsü nung aibelen tulutibaji iba ya asütsü, ta ACAUT-i ashi.
Iba tebilemba ya ACAUT-i dang masü saka Naga Hoho, ENPO, NCD aser NMA ama Naga nunger tongti teloktemia kasa bilemer.
FNR-i ketdangsüa Naga Concordant aser Lenten agreement agitepba ajanga Naga nunger putepshiba mapa tetenzüker asütsü ta Naga nunger public-i imlaa liasü saka anaben tashi Naga nunger taginüba metongtetdaktsüi anenogo.
Ajisüaka, ACAUT Nagaland-i teimla ajakbo mesama aser Naga yimten ken o asoshi inyaktsü tenzükdang nungi alir lennirtem akümli nung alidangsa longjemtettsü ta tamang akar.
ACAUT Nagaland-i Naga nunger yimten telok ajak dang FNR-i tenzüka ayuba mapatem tembanga inyaktettsü atema chichiba Khristan tangatetba nung longjemtsü ayongzüker.
Naga nungertemi Naga Concordant aser Lenten agreement tamakok anguba indang kuli metetnür anungji FNR-i yimjak nung iba onük metetdaktsütsüla ta ACAUT Nagaland-ibo bilemer. October 31, 2013 nü telemtetba agiba ama public-i mapa inyakba atema kanga pelar, ta ACAUT-isa sangdong nung shia lir.