Nagaland nung World Mental Health Day mungogo

Kohima, Oct. 10 (TYO): Tanü Nagaland nunga World Mental Health Day mungogo, aser iba anogomung nung tekolok manemertem akhümtsübua anepalutsü tim agi anepalua yariba ajanga parnok taküm nung temelenshi tulu alitsü tangatetba nung mungogo.
State Mental Health Institute (SMHI), Kohima nung ‘Dignity in Mental Health’ omen nung ayongzüka amungba sentong nung tongti tesemdanger, Director Family Welfare, Dr. Watikala-i, tekolok manemi alirtem dak sentakba onüktem state nüburtem nem angatetdaktsütsü aser lokti nem shisaliok agütsütsü nüngdaka lir, ta ashi.
Laisa, “nisung aikati tekolok manemi timtemba ya atak-atem ka ama züngshir, ajisüaka atangji nungbo iba ya tanga tashitaktem ama lir aser alima nütsüng shilem 10 bo tekolok shisatsü manemba dak sentakbatem lir.” ta ashi.
Dr. Watikala-isa ashiba agi, tekolok nung timtema aliba nisung mesüra tanur ka ajiteta anepalutsü atema nüburtem, kibongtem, ozüng amertem, school tesayurtem aser Arogotem nem angatetdaktsütsüla iba den külemi lokti nungi parnok mesentoktsüla.
Tanü iba anogomung omen nung jembidang SMHI medical superintendent, Dr. T Wabang-i, “Anepalubaren nung akhümtsübuba aser agizüktetbaji nüngdak, koba ajanga parnok taküm nung temelenshi tulu alitsü,” ta ashi.
Dr. Wabang-isa, nütsüng shilem 6-7 shisatsü dak sentakba ajanga timtemer aser kibong pezü nungi kibong ka nungbo züngsem ka dakbosa yimya tsüya nung timtem mesüra shisatsü nung timtem lir, ta metetdaktsü.
Kasa sentong nungsa NMHP state program officer, Dr. Leamnyei Konyak-i tekolok shisatsü dak sentakba service balala aika Kohima dak alaka tanüngba district tem nungbo metenzük, ta metetdaktsü.
Kobi melii sangküm Dimapur aser Mokokchung nung district mental health program tenzüktsü, ta paisa metetdakja liasü.