Küm 38 sülen Brazil nunger Pele Kolkata nung arua lir

Kolkata, October 11 (Agencies) : Küm 38 sülen Brazil nunger football asayar mongin Pele Deobarnep Kolkata tonga aruogo.
1977 küm Pele-i mezüng City of Joy nung tetsüng ajemok aser ibaji Cosmos aser Mohun Bagan tsüngda asayadang aruba liasü.
Asemben tashi World Cup takok angur Pele yasüng Dubai nung yipzüker tanep Kolkata yimti tonga aru. Iba mapang Indian nunger footballer ana – Chuni Goswami o Dipendu Biswas nati Taj Bengal hotel nung pa pela agizük.
“Ni pela agizükba atema kanga pelar. I Kolkata meimer. Ni idaki aliba nübortem meimba atema ni tanü yangai arua lir. Ni India meimer” ta Pele-i Netaji Subhas Chandra Bose International Airport tonga aruba sülen osangbener dang ashi.
Hombarnü Pele-i Atletico de Kolkata tenüng nung osangbener senden ka nung o jembitsü aser iba sülen anüngdang NSHM college, Kolkata nung kaketshirtem den ajuruteptsü. Sentong tongtipangbaji asüng nikongtsütsü Netaji Indoor Stadium nung alitsü aser iba mapang pai 1977 küm Eden Gardens nung asayaba Mohun Bagan asayartem ajuruteptsü.
Nikongtsütsü agiba sentong nung Sourav Ganguly aser A.R.Rahman na adentsü imlar aser ano video conference nung tennis asayar Rafael Nadal-ia shilem agitsü osang angazükogo.
Mongulbarnü Pele-i Atletico de Kolkata asayartem den ajuruteptsü aser iba sülen Atletico de Kolkata aser Kerala Blasters tsüngda Indian Super League (ISL) asaya reprangtsü.