New Zealand PM-i India nung tourism ambassador asütsü Sidharth shim

Wellington, October 12, 2015: New Zealand Ato Kilonser John Key-i, Bollywood actor Sidharth Malhotra linük asoshi India nung tourism ambassador asütsü shimogo. Iba shimba mapang tena selfie-a ka tangoka liasü.
Sidharth-i Bollywood nung “Student Of The Year”, “Ek Villain” aser “Brothers” film tem nung shilem agia lir aser Ato Kilonser John Key-i pa nem New Zealand rugby team ‘Blacks national team’ indang tola-a ka agütsüogo.
John Key-i den pa Bollywood, kaketshisatsü, saisapong aser chiyungtsü balala dak sentakba nung sensaksema liasü.
“Kena Bollywood film tem indang jembiba mapang pai Shah Rukh Khan ajuruba otsü kü den lemsatepa liasü,” ta Sidharth-i IANS dang ashi.
“Pa ajak den kasa aser pai ashiba agi, pa politics nung shilem agir taküm agi küm 15 buba ang lir,” ta pai shisem.
Yimten lennir kati kü den kanga pelashishia ajurutepa selfie tena tangokba ajanga ni kanga jangratema bilem, ta Sidharth-i ashi.
Tena sensak asemba mapang New Zealand nung Bollywood film tangoktsü atema-a jembisema liasü.
“Ni ajanga par linük nung tourism aser business tsütsü tali sentaktepa akümtsü imlar,” ta Sidharth-i ashi.
Sidharth ya tang New Zealand nung anogo ti nü asoshi oa lir aser pai iba mapang Oscar angur Richard Taylor dena ajurutepogo.