Dimapur nung yi jemer gari anirtem aser mobile phone amshirtem merenshitsü

Dimapur, October 12 (TYO): Dimapur Traffic Police-i yi jemer gari anishiba putetra ozüng tapet agi merenshitsü ta osang metetdaktsüogo.
Yi ajemba tendangtsü atema amshiba ‘breath analyzers’ tajungtem Traffic Police-i amshitsü bener aruogo aser parnoki item ‘breath analyzers’ amshia nisungtem tendangtsü, ta Addl. Dy. Commissioner of Police/PRO, Dimapur-i sangdong ka nung metetdaktsü.
Police-i amshiba ‘breath analyzers’ jagi mapang tatsüka tsüngda printed report agütsütsü aser yi ajemba kuli ngura ozüng tapet agi merenshitsü, ta paisa shisem.
Ano, Dimapur Traffic Police-i Government departments/ NGOs dang ‘no entry’ mapang gari tulutem senzütsü atema permits/authorization letter magütsütsü mepishia metetdaktsüogo.
Item tezülubatemji check points nung magizüktsü, kechiyong nübortem sadema senzüdaktsütsü nükjidong nung gari tulutem district telungi maittsü tenokdangba agütsü. Anungji gari tulutem mesenzütsü atema mapang atakzüka aliba nung nisung ajaki tashi angaa anidaktsü mepishir, ta Dimapur police sangdong nungsa shia lir.
MV Act nung Arrla 177 kübok gari aniba mapang mobile phone mamshitsü tenokdangba agüja lir aser iba anema inyakertem ozüng agi merenshitsü lateta lir. Anungji Dimapur Traffic Police-i gari anidang mobile phone amshitsü memelar aser nisung ajaki pei taküm lendong nungi jenbua alitsü atema iba tetuyuba sülen anidaktsü metetdaktsür, ta sangdong nungsa shia lir.