PM Modi-i July 15 nü Skill India Campaign tenzüktsütsü

New Delhi, July 13 (Agencies): July 15 nü ‘World Youth Skills Day’ anogomong nung Ato kilonser Narendra Modi-i Skill India Campaign tenzüktsütsü, ta tanü Skill Development & Entrepreneurship Minister Rajiv Pratap Rudy-i ashi.

Ato kilonser-i National Skill Development Mission, new National Policy for Skill Development & Entrepreneurship 2015 aser all-India flagship scheme, Pradhan Mantri Kaushal Vikas Yojana (PMKVY) tenzüktsütsü, ta tanü New Delhi nung sentong ka nung jembidang Rudy-i ashi.

“Vigyan Bhavan nung iba sentong nung tongti tesemdanger asütsü atema Ato kilonser Narendra Modi-i melungogo,” ta ketdangser osang ka ajanga ashi.

Linük tesem ajaklen teka mapa balala nung takotet akümtsü nükjidong ataloktsü asoshi Skill India Campaign ya tongtibang mera ka lir, ta minister-i ashi.

“Iba sentong ajanga central ministry tem, department tem, state sorkartem, industry tentettem, aser training agirtem longjemdaktsütsü. Skill India takok angutsü asoshi item stakeholder ajak den Partnership yanglutsüji kanga tongtibang,” ta paisa ashi.

Iba sentong nung ‘Skill Loan’ mapatong ka tenzüktsü, aser iba mapatong ajanga taruba küm pongu nung skill development programme nung adentsü jangrar lanur lakh 34 dak tema nem sen 5,000 nungi lakh 1.5 tashi aputsütsü, ta Rudy-isa shisem.