Tim mesüi mapa nung shimokba anema okadak PIL benoktsü : ACAUT

Dimapur, Oct. 13 (TYO): ACAUT Nagaland-i ochimashi anema raratsü ta nübortem tsüngdang nangzükba ama sorkar department balala nung RTI benoktsü tenzük aser itemji ajanga tim mesüi shimba maparen aika jungkai adoka putetogo, ta Media Cell, ACAUT Nagaland-i sangdong ka nung metetdaktsü.
Ochimeshii inyakba mapa aika putetaka Nagaland sorkari item anema mapa inyaktsü memelunger. Ozüng alema mapa nung shimokba nisungtem agientsü aser item mapa inyakba ketdangsertem merenshitsü atema sorkari memelunger. Anungji ACAUT Nagaland-i item ochimeshii mapa nung shimokba ken o tem okadaki abentsüsa akümer, ta sangdong nungsa shia lir.
Sorkar department balala nung ozüng alema mesüra tim mesüi nisungtem mapa nung shimokba ken o ajak asoshi ACAUT Nagaland ket nung kuli teperi lir aser item ajakji okadak benoktsü.
Tasütait aser lokti atema bilemtsür lawyer kari ochimashi anema raratsü atema okadak Public Interest Litigation (PIL) ka benoktsü mulungsoa tenlaogo. Ibaji dang masü parnoki PIL ji angati dang okadak benoktsü ta shiogo aser iba atema Naga nunger ajaki pelatsüla aser parnok pusema nungittsü ayongzüker, ta ACAUT Nagaland-isa metetdaktsü.
Ochimashiba ken o tem okadak benoka angadangdang teinyaktsü aika ajurur anungji nübortemi item ken o metembang tashi aremzüka atatsü mepishir aser maneni sarasadem ajanga nungittsü ayongzüker, ta parnokisa shisem.
ACAUT Nagaland ket nung ochimashi inyakba onük aika nübortemi agüja lir saka timtem aliba ajanga ken o ajak agizüka meinyakteter anungji nübortemi iba timtem angatettsü mepishir, ta ACAUT sangdong nungsa shia lir.