Linük senso crore 125 kümzüka ayutsüji Modi mapa: Cong

New Delhi, October 14 (Agencies): Tawa Dadri nung lokti kati Muslim nunger tebur ka tepsetba dak sentakba nung Ato kilonser Narendra Modi aija tanü Congress otongdar tongti, Randeep Surjewala-i, “Narendra Modi ya teshimtet kar amatokba agi shiranger. Pai pa linük ajunga atema Ato kilonser aser India nunger senso crore 125 kümzüka ayutsüji pa khuret ta pai amatokogo,” ta ashi.

Congress lenirisa, Dadri nung atalokba sülen Ato kilonseri Uttar Pradesh chief minister Akhilesh Yadav den-a jembi asü mejembi (?), ta ashi.

“Ato kilonseri par minister, Mahesh Sharma nem kechi temerenshi agütsü’ar linük dang ashitsü asü (?) Ano tanga minister ka, Sanjeev Balyan nem pai kechi temerenshi agütsü (?) Ano pai ilk Sangeet Som nung BJP lenirtem aser Sadhvi Prachi aser tangartem nem-a kechi temerenshi agütsü (?)” ta Surjewala-i asüngdang.

Interview ka agiba mapang Ato kilonser Modi-i opposition party temi taila secularism aser telemsa adokdaktsüba politics asayar ta aitsüba den külemi Dadri nung nisung tepsetba aser Mumbai nung Ghulam Ali indang kenten sentong memelabaji ‘tai maka tatalokba ka lir’, ajisüaka iba nungji par sorkar teinyaktsü shilem kecha mali, ta ashi.

Modi-isa, opposition party temi minority temji communalism tenüng amer vote bank atema amshir, ta aitsü.

“Dadri tatalokba mesüra Pakistan nunger kentener anembaji majung, aser tia maka atalokogo. Ajisüaka item tatalokbatem nung Centre sorkar tesentaktep kechi ali (?),” ta Modi-i Bengali osangkaket, Ananda Bazar Patrika den jembidang ashi.

Modi-isa, “Item ama tatalokbatem ya BJP-i kodanga pusema maru,” ta ashi.

Ano JD(U) Tir, Sharad Yadav-ia Ato kilonser aija, cricket team-i takok anguba atemabo pai (Modi) kanga kera jembir, ajisüaka Dadri nung atalokba indangbo kanga menor jembiogo, ta aitsüogo.

Aam Aadmi Party (AAP) lenir Ashutosh-ia, tanü Ato kilonseri jembiba olen aitsüogo.

AAP leniri, “Ato kilonser, nai sangdong agütsüba ama nai meinyakra nüburtemi nai jembiba o mamangtsü. Ibaji taila sangdong ama agitsü,” ta ashi.

“Tamangba yimsü ajak sadoka amangba, adianu temeimtep, tebilemba sadoka jembiba onüktem nung ola madokba ya Ato kilonser ka memesük, iba sülen temelung tesadang ka agi sangdong agütsür,” ta paisa shisem.