Punjab nung Sikh nunger lungkak ait, nisung ana asü

Chandigarh, October 14 (Agencies): Guru Granth Sahib mezüngmeshiba anema Bodhbar nü Punjab, Faridkot district kübok Kotkapura jila anasa Sikh nunger lungkak aitertem aser police na tsüngda rara tulu adoka nisung ana asü aser nisung 70 jungnüa yiruogo.

Osang ajanga ashiba agi, Kotkapura anasa Behbal Kalan tesem nung police aser lungkak aitertem na tsüngda kahtep, aser ibaji ajanga nisung ana asü aser aika yiruogo.

Lungkak aitertemi lungro, lung aser tanga osettem amshia police dak aonba ajanga police-i ajok amshiba den tzü kaloktsü aser anünglen injang-a kahtoka liasü.

Chandigarh nungi kilometer 230 pila oor Kotkapura jila tiyong nung police-i lungkak aiter lenirtem aputsü merangba ajanga rara tulu adoka liasü. Lungkak aitertem jagi Moga aser Bathinda jila nati aoba highwaytem mokdanga liasü.

Iba lendong nung police ketdangser 30 densema kanga mejungi yirura alir lungkak aitertemji hospital-i anir oa liasü.

Kotkapura nungi kilometer 15 shi pila oor aliba Bargari yimtsüng nung ‘bir’ (Sikh temeshi kaket) raksatsüba anema lungkak aitertemi raraba oset bener lungkak it.

Hombar nü Kotkapura tesem nung aliba Sikh tekülem ki ka anasa lenmang nung Sikh nunger temeshi kaket tapak 100 shi prokshia anguba sülen tensa mejungi akum.

Iba temeshi kaketji taküm June ita nung gurdwara (tekülem ki) ka nungi kari auyaa liasü.

Temeshi kaket raksatsüba indang osang balala social media nung prokshiba sülen Bodhbar anepdang tensa kanga mejungi raksa.

Punjab Chief Minister Parkash Singh Badal-i nüburtem dang süngjemtsü mepishiba den külemi state sorkari temeshi kaket raksatsüba indang bushisüngdangtsü atema deputy inspector general (DIG) A.S. Chahal lenisüba nung special investigation team (SIT) ka tentetba osang sangdongogo.