Myanmar-i sorkar anemer telok 8 den yimjung tezüngzüktep agir

Myanmar sorkar aser sorkar anemer telok 8 na tsüngda yimjung tezüngzüktep ka Naypyitaw yimtiba nung tanü Brehostibar nü agiba sülen Myanmar Tir Thein Sein (Tejaklen, Achijilen nungi 4 buba), sorkar ketdangsertem, sorkar anemertem aser international tetendangertemi agiba arok noksa ka yangi angur. (Naypyitaw, October 15)

Naypyidaw, October 15 (Agencies): Myanmar sorkari sorkar anemer telok 8 den yimjung nung alitsü tezüngzüktep ka tanü Brehostibar nü agiogo.

Ajisüaka, sorkar anemer tongti telok ishikati Myanmar sorkar den yimjung tezüngzüktep agitsü memulungi aliba osang jangjaogo.

“Myanmar sorkar aser sorkar anemer telok na tsüngda tan agiba National Ceasefire Agreement (NCA) tezüngzüktep ya tarutsü putu atema sempet tajung ka renemtsür lir,” ta Myanmar Tir, Thein Sein-i tanü Naypyidaw yimtiba nung tezüngzüktepji zülutepa agiba sülen metetdaktsü.

“Sorkar o sorkar anemer na tsüngda tongpang raraba ajanga nisung meyirijang aika süogo. Ano, tongpang raraba tesemtem nung alir nisung meyirijang aikati tang timtem toushi jenti ajurua lir,” ta pai ashi.

Ano, tarutsü mapang nung züngsem meyirijang jenti densemba Kachin aser Wa sorkar anemer telok na densema tan sorkar den yimjung tezüngzüktep agitsü memulungba teloktem dena yimjung tezüngzüktep agitsü asoshi nungdakba maparen bendanga agüja inyaktsü tenangzükba olen ka Sein-i metetdaktsü.

“Myanmar sorkari par mitkar tashi amshiba ajanga masü saka jembiteptsü senden ayonga amenba ajanga tanüngba sorkar anemertem den yimjung yanglutsü ajungshir,” ta tan tezüngzüktep agir rong nung tongti telok, Karen National Union (KNU) lenisang, Saq Mutu Say Poe-ia tanü metetdaktsü.

Küm 60 tejaklen nungi tenzüka Myanmar sorkar anema raraba teloktem rong nung KNU telok ya tongtiba lir.

Ano, tan tezüngzüktep agiba sülen Myanmar sorkar aser sorkar anemer nati anogo 90 tsüngda nung yimtenren sendena amen tenzüktsü sentong renema lir.