21 Buba MDFA: Shitilong SA o Walunir Ritsung na quarterfinal-i iogo

Dimapur, October 15 (TYO): Shitilong Sports Association aser Walunir Ristsung Artang telok nati tanü Brehostibar nü takok ngua tang tasayadak 21 buba MDFA asayamong quarterfinal nung shilem agitsü jenjang nguogo.
Tanü tanabuba asaya nung Shitilong teloki goal 1-0 agi Sports Society Suyim telok madak takok ngua Pool C nungi quarterfinal nung shilem agitsü jenjang ngua liasü.
Tanü asaya tetenzülen Suyim defender kati par D-Box telung nung Shitilong striker ka alangdakja foul menazükba yong referee-i Shitilong telok nem penalty metsütsü maongka agütsü.
Aji oda, midfielder Lipoksashi-i penalty kick-ji takok ngua metsüa par Shitilong telok asoshi goal agütsü.
Tesülen, Suyim asayartemi kanga meranga asaya saka asaya tembangba mapang tashi nung par telok nem agütsüba goal meyiptsütetba yong par teloki tamakok ajurutsüsa aküm.
Tanü mezüngbuba asaya nunga Walunir teloki goal 5-0 agi Youngsters’ FC telok madak takok ngua Pool B nungi quarterfinal asayatsü jenjang angu.
Tanü asaya tenzüker minute 2, 9, 10, 41, aser 67 buba nung Walunir teloki goal 5 tashi agüja tanü asayaji kokadok.
Tanü takok anguba sülen Walunir teloki NU Lumami (PGSU-L) telok den tan asayamong indang mezüngbuba quarterfinal asaya tan Honibar nü asayatsü lemzükogo.
October 16 nikongtsütsü 1:00 ako nungi tenzüka asaya yamai alitsü:
1st Match: Onet Korang SC Vs Dilong YA
2nd Match: Zonipang SA Vs OCYU