Ukraine, Japan & Egypt nunger UNSC züngsem akümer

United Nations, October 16 (Agencies): Ukraine, Japan aser Egypt nungeri United Nations Security Council (UNSC) züngsem akümtsü jenjang yashi Brehostibar nü ajangzükogo.

Yashi UN General Assembly senden nung miim vote agiba sentong ka agiba sülen Senegal aser Uruguay natia nungdakba vote ngua UNSC züngsem akümtsü jenjang ngua liasü.

Yashi bendenba vote ajunga nungi Senegal-i vote 187, Urguay-i vote 185, Japan-i vote 184, Egypt-i vote 179 aser Ukraine-i vote 177 ngua UNSC nung züngsemtsü jenjangji angu.

“UNSC nung züngsemtsü jenjang anguba atema kanga pelar. Iba jenjang tajung anguba ajanga ozü Ukraine linük indang peisasa pei madak yimsü asütsü temeten aser ozü lushi kümzüka ayutsü lenmang tesademba lapoktsütsü imlar,” ta UNSC nung züngsemtsü jenjang anguba sülen Ukraine Tir, Petro Poroshenko-i metetdaktsü.

Tan shimtetba linük 5-i Chad, Chile, Jordan, Lithuania aser Nigeria nunger melenzüka taruba 2017 küm January ita 1 nü nungi tenzüka UNSC nung küm 2 tashi züngsemtsü.