Muslim nungeri nashi shi machitsüla: Himachal CM Manohar

Chandigarh, October 16 (Agencies): Dadri nung atalokba ken o nung mangatettep adoka aliba mapang ka nung Hokolbar nü Haryana Chief Minister Manohar Lal Khattar-i, Muslim nungeri maneni India nung litettsü, ajisüaka parnoki nashi shi toktsütsüsa akumtsü, ta ashi.

Tanü ‘The Indian Express’ den interview ka agiba mapang Himachal CM, Khattar-i, India nung nashi ya tamang indang temaitsü ka lir, anungji Muslim nungeri nashi shi achiba anentsüla, ta ashi.

Bharatiya Janata Party (BJP) lenir aser taoba mapang Rashtriya Swayamsevak Sangh (RSS) pracahark, Khattar-i, Dadri nung loktii nisung tepsetba tatalokbaji aibelen ka lir aser ibaji junga mangatettepba ajanga adok, ta ashi.

Khattar-i ashiba agi, Bhagavad Gita (Hindu nunger temeshi kaket), nashi aser Saraswati ayongji linük nung tamang temaitsü ama züngshir aser Muslim nungeri nashi shi machiba ajanga par tamangba yimsü alema inyaker masütsü südi, ta ashi.

Paisa, Mohammad Iqlakh tepsetbaji aibelen ka inyakogo; ajisüaka item tatalokbaji kechi ajanga atalok’ar ibaji shisadangtsüla aser aibelenertem nem temerenshi tulu agütsütsüla, ta ashi.

Ano külen ANI den jembidang CM Khattar atema Officer on Special Duty, Jawahar Yadav-i, osangkaket nung adokba osangji tai ta shia, Haryana CM-i, asenoki ajak nem akhümtsübu agütsütsüla ta jembiba dang, ta ashi.

Bodhbar nü Ato kilonser Narendra Modi-i Dadri nung atalokba dak sentakba nung, item ama tatalokbatem BJP-i pu masemer, ta shiogo.

Ato kilonser Modi-i, Dadri nung tebur ka tepsetba aser Pakistan nunger kentener Ghulam Ali indang kenten sentong Mumbai nung thinentsübaji tai maka tatalokba lir, ta ashi.