Kerry-i Netanyahu den taruba hopta ajurutsü

Milan, October 17 (Agencies): US Secretary of State, John Kerry-i Israel Ato Kilonser, Benjamin Netanyahu den Europe nung taruba hopta ajurutsü sentong renemogo.
Netanyahu den ajurutepdang tang Israel o Palestine na tsüngda tensa kanga mejungi akümba onük benoktsü sentong renema lir.
“Ozü lenir, Kerry-i Milan semdangba jakdang Israel lenisang, Netanyahu den telephone ajanga yashi jembi aser idangji tenati taruba hopta ajuruteptsü sentong renem,” ta US State Department otongdar, John Kirby-i osang jangjashitsü.
Yashi telephone ajanga jembidang Kerry-i Israel nüburtem amakba kiralongrartem aitsüba olen ka metetdaktsüba den külemi, Israel-i par sensotem taküm kümzüktsü asoshi nungdakba maparen inyakbaji tim aliba olen ka lemsatepa liasü.
Par US-i Israel o Palestine na tsüngda tensaji maneni tendanga reprangtsü nangzükba den külemi, par linük ana tsüngda tanaben tensa tajungba kümdaktsütsü asosh nungdakba maparen inyaktsü asoshi mulunga aliba olen ka Kerry-i yashi metetdaktsüba osanga jangjaogo.
Aji oda, Kerry o Netanyahu nati taruba Bodbar nü Germany kübok Berlin yimti nung ajuruteptsü akok.
Ajisüaka, tenati ajurutepa senden amentsü tesem aser anogo tejangja tanü tashi metetdakja mali.
Ano külen, Kerry-i Palestine Tir, Mahmoud Abbas dena telephone ajanga yashi tongtepratepba osang ka Kirby-i metetdaktsü.
“Israel aser Palestine na tsüngda tensa mejungi akümba atema tebilemtsü akar. Ano, tekaraba mapang nung tensaji tajungba kümdaktsütsü asoshi ozü US-i nungdakba maparen inyaktsü mulunga lir,” ta Kerry-i Abbas dena lemsatepa liasü.
Ano, kati ka aitsübaren anena tan lendong ataloktsü tenzükbaren anentsütsü asoshi bendanga agüja inyaktsü tajungshiba olen ka Kerry-i Abbas dang metetdaktsüogo.