Vyapam ken o nung MP Angh anema tongti kuli lir

Bhopal, July 13 (Agencies): Vyapam ken o nung aibelen tonglokja alir rongnung “No 10” nung alisang Madhya Pradesh Angh, Ram Naresh Yadav-i inyakyim anema aser tenüngmenük asoshi khuret magii pa menden nungi alutsü memulunger, ta osang ka ajanga ashi.

Tanü NDTV-i iba ken o nung computer file nungi tongtibang kuli anguba nung, süpokrem agir aser pei menden tim masüba nung amshir rongnung Angh (Ram Naresh) densema liasü.

Tang tashi nungbo Angh anemabo bushisüngdang agia mali, kechiyong Madhya Pradesh High Court ajanga, pa office menden nung ali tashibo ibaji memelar ta ashir.

MPO High Court-i, ajisüaka pa kuli ojibo state bushisüngdangertemi record sütettsü. Yadav anema bushisüngdangtettsü asoshi pa menden nungi aludaktsütsü asoshi Supreme Court-i bilemdagi, ta ashi.

Ajisüaka, tanü NDTV den jembidang BJP otongdar GVL Narasimha Rao-i, “Angh office ajanga iba ama maongka agiteter ta onoki mamanger,” ta ashi.

Yadav ji office menden nung liaka pa anema bushisüngdangtettsü, ta paisa ashi.

Yaküm state police-i Angh Yadav aser par jabaso na anema kuli bener arua FIR ka benoka liasü. Taoba mapang Vyapam nung ketdangser Pankaj Trivedi aser Nitin Mohindra naprongla puogo aser tenati ashiba agi, forest guard mapa atema Angh-i tenüng pongu benoka liasü. Parnok indang computer file nungji ‘Angh’ tetshia lir.

Tanü nungi tenzüka CBI-i bushisüngdangba Vyapam ken o dak sentakba nung asür nisung 30 rongnung Angh Yadav’er jabaso Shailesh Yadav densema lir. Angh’er official kidang pai süpokrem sen lakh asem agizükogo, ta Police FIR nungji shia lir.