Nashi shi party ayongsang J&K MLA dak azük

New Delhi, October 19 (Agencies): Tawa Jammu & Kashmir Independent MLA, Sheikh Abdul Rashid-i Srinagar nung nashi shi party ayongzüka akaba atema pa dak azük, aser tanüa New Delhi nung nisung kari pa dak shihai tanak shiloktsüogo.
‘Engineer Rashid’ ta ajasang MLA Rashid-i Delhi nung osangbenertem senden ka ayongzüka agiba sülen nisung kari pa dak shihai shiloktsü.
Rashid dak iba mapa inyakbaji Hindu Sena telok ajanga liasü aser iba telok nungi nisung ana puogo.
“Yimsü metsüngareta benshirtem indang shisatsü tamajungji onoki jungkai adoka India nem ngudaktsüner. Onoki menoktaki malitsü. Onoki tatem tashi raratsü. Iba ya Gandhi’er India masü saka Modi’er India kümogo,” ta Rashid-i ashi.
Press Club kima TV osangbenertem den jembia aliba mapang nisung kar yimyim ayima aruba sülen pa dak pongoka shihai aser mobil totzü shilokja liasü.
Tawa Srinagar nung MLA hostel nung Rashid-i nashi shi party ayongzüka akaba sülen assembly senden nung Bharatiya Janata Party MLA temi senteper pa dak züka liasü.
“Ni nashi shi, napong shi mesüra an shi machir, ajisüaka ketdangsertem dang, tanga tamangba yimsü nung teka mamoktsü atema ibaji ni lungkak aitba ka liasü,” ta tanü Rashid-i osangbenertem dang ashi.