Dr. Benjongliba-i ‘Soil Nutrient Mapping of Nagaland’ sayatsü

Dimapur, July 13 (TYO) : July 13, 2015 nü IETC Campus, Medziphema nung Farmers Hostel lapokba den külemi Soil Nutrient Mapping of Nagaland sayaba sentong agi.

Sentong nung tongti tesemdangerji Agriculture, Palriamentary Secretary, Dr. Benjongliba Aier liasü.

Tsünüsenbongtsü junga tsünütettsü atema tongtipangtibaji ali tajung den temo aketba ali alitsüla, anungji ali junga anepalutsü nüngdak. Iba dak sendakba nung tanü-asüng amshiba technology ajanga teyari tulu agütsür, ta Dr. Benjongliba Aier-i ashi.

“Regional Centre of National Bureau of Soil Survey & Land Use Planning, Jorhat nung Head & Principal Scientist, Dr. Utpal Baruah alidang April 3, 2012 nungi Soil Nutrient Mapping of Nagaland inyaktsü tenzük aser iba mapa October 2014 nung tembang ta ni angazüker. Tanü ni iba mapa tajung tembanga inyakba angudang kanga pelar aser ketdangsertemi yaritepa Nagaland state atema Soil Nutrient Mapping takok ngua inyakogo,” ta paisa ashi.

Dr. Benjongliba-isa, küm asem tashi iba mapa atema meranga inyakba ketdangser ajak nem tenüngsang agütsü aser Director, National Bureau of Soil Survey & Land Use Planning, Nagpur-i anir par telok dang kanga pelaba metetdaktsü.

Nagaland nung aliba ali nung temo maliba anepaluba mapa nung Soil Nutrient Mapping ajanga teyari tulu agütsütsü, kechiyong tzünglu kanga aruba ajanga asen li nung acid kanga lir, ta paisa metetdaktsü.

Paisa, APC-cum-Commissioner & Secretary (Agriculture) Imkonglemba Ao aser Agriculture Director, Bendangyanger-i anir ketdangser ajak dang pelaba metetdaktsü.

Nagaland chief minister T. R. Zeliang lenisüba kübok DAN sorkari senotsü peria meliaka, Nagaland state nung kechisarena ajak nung terenlok bener arutsü atema meranga inyaker. Tanep asenoki IETC Campus nung trainees hostel tajung lapokogo aser iba ya ajanga IETC nung training agirtem anisüngzük angutsü. Tesüiba küm 12 tsüngda DAN sorkari inyakba mapatem nenoki pelaa agizüktsüla aser onok den longjemer asen state renlokdaktsütsü asoshi shilem agiang, ta Dr. Benjongliba-isa ayongzük.

Tanü agiba sentong nung mendenji Agriculture Director, Bendangyanger liasü aser Commissioner Secretary & APC, Nagaland, T. Imkonglemba Ao-ia o jembi. Sentong nung Farmers Hostel yangluba indang osang G. Ikuto Zhimomi, Jt. Director, Agriculture-i metetdaktsü aser Dr. Surendra Kumar Singh, Director NBSS & LUP, Nagpur-i o tatsüka jembi, aser Nguzonyi Wetsah, Principal IETC & Director SAMETI-i anküp tepela o jembi.