‘A Dog’s Purpose’ film India nung sayaogo

Mumbai, March 31 (Agencies) : Steven Spielberg-i Reliance Entertainment, India den lokteper produce asüba “A Dog’s Purpose” film ajanga global box office nung sen crore 1,100 (175 million dollar) aatetba sülen Hokolbarnü India nunga sayaogo.
2010 küm W. Bruce Cameron-i züluba novel ka nung aliba otsü nung ajemdaker Lasse Hallstrom-i direct asüba film ya sen million dollar 22 intoka yanglu.
‘A Dog’s Purpose’ film ya taküm küm tetenzüklen US aser China na nung saya aser China kisüng nung sen crore 500 (75 million dollar) tashi aatet, ta Reliance Entertainment sangdong ka ajanga metetdaktsü.
Iba film ya ano London, France, Spain, Portugal, Australia, Japan aser Russia linüktem nungbo masaya. Film produce asür rongnung Spielberg meyong Amblin Entertainment, Walden Media aser Pariah Entertainment Group den India nungi Reliance Entertainment dena lir.
“A Dog’s Purpose” film ya azü kati pa taküm kechi atema yanglu ibaji metetsü merangba otsü lir.
“Iba film otsü ya kangasa junger; Ni yangi shilem aginüseta agi. Iba azü jagi ni metsüba mezüng azü, Gertrude bilemtetdaktsü,” ta film nung tongti shilem agisang Dennis Quaid-i ashi.
Iba film nung Quaid den külemi Britt Robertson, Josh Gad, KJ Apa, Juliet Rylance, John Ortiz Kirby Howell-Baptiste aser Peggy Lipton nungeria shilem agia lir.