A.S.L.B. nungi Ao phonetic symbol amshiyim tesayuba agütsü nung ajungtsü ?

– Imti Jamir, Kohima.

Asen Ao oshi nung phonetic symbol amshiyim A.S.L.B. nungi tesayuba (guideline) agütsü nung kanga ajungtsü. Tatishitsü agi:- nì (high tune i.e. nì inyak), ní (low tune i.e. ní shiranger), àsang (palm), ásang (fern) etc. Zülu kasa saka olasü balala nung asenoki aibelena azüngba tatishitsü  otsü ka lemsateper:- sentep kidang palm Sunday anogotem nung Yohan 12: 13 azüngdang olasüyim àsang (palm) kongsang ta masü ásang (fern) kongsang tasa  azüng. Anungji joko khen mapang ka tila tanurtemi palm Sunday nung drama aiba mapang ásang (fern) kongsang kar bener arua Yisu Yirusalemi takok ngua aiba indang sayu. Roman yimli mapang (Yisu alima nung aliba mapang) àsang kongsang (palm branch) ya takok tulu angur nem tenüngsang aser tetushi (honour) agütsüba temaitsü lir. Anungji Yohan 12: 13 nung àsang kongsang ta azüngtsüla. Yangi ojang tai azüngba indang ashishir masü, saka Ao-o nung phonetic guideline nüngdaker ta asüba tatishitsü ka agütsür.

Alima nung tongtipang oshitem nung phonetic symbol aser guideline agüja lir aser yamaji Computer nung MS-Word lapoker Insert-Symbol nung asenoki itemji nüngdakba mapang inoka zülutsü akok. Ao züluyim-ji Chinese oshi (Pinyin) den anasatepa lir, anungji Pinyin phonetic tune den metemdanga agütsür. Pinyin nung symbol pezü (4) lir itemji vowel a e i o u ü nung inoka amshir. Item pezüji- 1. à-high tune, 2. a- middle tune/neutral tune, 3. a- falling-rising (Ao-o nung ibai amshitsüsa ojang mali) 4. á– low tune. Bushidangra asen Ao-o nung phonetic symbol amshitsüji asem dang lir : 1. high tune e.g. àsang (palm), àsüng (tomorrow) etc, 2. middle tune/neutral  aser 3. low tune e.g. ásang (fern), ísü (tried bamboo shoot) etc. Social media e.g. facebook group amala nung aseni Ao-o züludang phonetic symbol inoka züluba ajanga bendangeri Ao-o olasüyim tajungba züngtettsü akok.

Ao oshi asoshi A.S.L.B.-ji tekolak asünung A.S.L.B. nungi tekalen agüja aliba dak sendakbaren tesayuba (guideline) agüja amshira ajungtsü ta tangatetba nung iba ocet kü tebilemba saka nüngdak ta ajiteta lemsateper. Tatemsa, tazüngeri meratatsü atema yamai shinür, Ao zülu nung phonetic symbol inoka amshitsü ta asübaji, nai kaket adokdang mesüra ocet balala züludang ojang shia phonetic symbol-ji inoktsüla ta masü (ibaji mapa tasak asütsü) saka nai züluba kaket mesüra ocet amala nungji nai ojang kar zülu kasa saka olasü balala alidak tazünger nem benteta züngdaktsütsü atema nai inoksema zülutsü akok e.g. àsang (palm) ásang (fern).