Aadhaar amshia SIM card verification temelaba kümdaktsür

New Delhi, October 25 (Agencies): Tang amshia aliba mobile subscriber tem Aadhaar amshia re-verification asüba maparen temelaba kümdaktsür, ta ketdangser osang ka ajanga ashi. Telecom subscriber tem tanaben verification asüba maparen temelaba kümdaktsütsü asoshi sorkari re-verification ya subscriber indang kima nung renema inyaktettsüba, aser One Time Password (OTP) amshia iba mapa inyaktsü renemer. Matamabensar, shiranger mesüra nisung taintem atema temelaba kümdaktsütsü mechi telecom operator dang iba re-verification ya customer tem ki tonga oa inyaktsütsü tetuyuba agütsüogo, ta kasa osang ajanga ashi.
Iba ama maparen online nungi inyaktsü asoshi online mechanism mesüra website agütsütsü shiogo. Tang mobile amshirtem tenüng jangjashitsü asoshi re-verification agiba mapang Aadhaar OTP (One Time Password) amshitsü. OTP amshia re-verification asütsü atema telecom service agütsürtemi SMS, IVRS mesüra mobile app amshitsü tetuyuba agütsü.
Tang tashi nung Aadhaar database nung mobile number crore 50 jungnüa register süogo, aser OTP amshia re-verification asüba temelaba akümtsü. Agent tem teyari nung SIM re-verification asüba mapang biometric agidang subscriber indang e-KYC ya agent nem magütsütsü mesüra agent indang device nung item data store mesüdaktsütsü asoshi telecom company nem tetuyuba agütsüogo, ta osang ajanga ashi. Tang bo mobile number re-verification agiba mapang e-KYC den noksa tem densema telecom operator indang agent ket nung agütsür.
Iba re-verification sentong takok ngua inyaktettsü asoshi aser talisa tantsür-tambur, shiranger aser matamabensartem atema ‘iris devices’ tem tesem abir amshitsü tetuyuba agütsü, aser iba ajanga nisung kar fingerprint junga magitetertem asoshi teyari tulu asütsü.
SIM tasen agizüktsü asoshia Aadhaar dak ajemdaker e-KYC agir. Mobile operator dang prepaid aser postpaid customer jungjunga verification asütsü atema sorkari nenshia metetdaktsüogo aser iba mapang 12-digit unique identity number amshitsü ashi. Iba re-verification sentong ya 2018 küm tetenzüklen tembangtsü sentong lir.