Aadhaar card aser bank accounts sendakteptsüla: RBI

New Delhi, October 21 (Agencies): India linük nung customer temi parnok indang bank account Aadhaar den sendaktepba mapang ka nung Honibarnü Reserve Bank of India (RBI)-i, parnoki Aadhaar aser bank accounts sendakteptsü atema tetuyuba magütsü, saka Indian sorkari iba telemtetba agi, ta metetdaktsü.
RBI-isa, Prevention of Money-laundering (Maintenance of Records) Second Amendment Rules, 2017 kübok onük kar nungbo Aadhaar number aser bank account na sendakteptsüla, ta ashi.
Moneylife India-i benokba Right to Information (RTI) Act application telangzüba nung ajemdaker RBI-i, “June 1, 2017 nü sorkari Prevention of Money laundering (Maintenance of Records) Second Amendment Rules, 2017 dak sendakba nung Gazette Notification GSR 538(E) ka agutsü, aser ibaji ajanga bank account ka lapoktsü atema Aadhaar aser permanent account number (PAN) nüngdaker. Iba dak sendakba nung Reserve Bank-i kecha tetuyuba agüja mali,” ta metetdaktsü.
RBI-isa, 2017 küm sangdongba ‘anti-money laundering rules’ nung ajemdaker bank temi tetuyuba mata yonga ibaji mapa küma inyaktsüla, ta ashi.
Sorkari bank accounts aser züngya 12 aliba biometric identification number sendakteptsü atema tetuyuba agüja lir, aser ibaji inyaktsü atema tatembangbuba anogoji December 31, 2017 lir.
Taküm August ita nung Union Finance Minister, Arun Jaitley-i India nung bank account million 736.2 bo Aadhar number million 524 den sendaktepogo, ta metetdakja liasü.
India nung Banks accounts-a saru dak sendakba, Permanent Account Number (PAN) den sendaktepogo.
Jaitley-isa, “Unique Aadhaar numbers billion ka bank accounts billion ka aser mobile phones billion ka den sendakteptsü. Kodang iba maparenji tembangdir India tesem ajaki rongsenkettsüng aser digital nung shilem agitsü,” ta ashi.