Aadhaar card bn 1.05 agütsüogo, cr 20 anünga lir: UIDAI

New Delhi, September 29 (Agencies): Parliament-i Aadhaar Act agizükba sülen ano tanüngba nisung crore tenüng züluoktsü anünga lir, shirnok tang tashi nung Unique ID (UID) system mali, ta UIDAI mendenbuba, J Satyanarayana-i ashi.

Tanü tashi nung Aadhaar biometric ID card billion 1.05 agütsüogo, joko sorkar aser  regulator-i national digital payments infrastructure amenoktsü atema IT amshi tenzükogo, ta ketdangser kati ashi.

Bodhbar nikongdang New Delhi nung Centre for Digital Financial Inclusion (CDFI)-i ayongba sentong ka nung video conferencing ajanga jembidang Unique Identification Authority (UIDAI) mendenbuba, J Satyanarayana-i, “Tanabuba tayongzükbaji billion ka dak tema osangtem update asütsü asoshi systems activate asütsüla. Iba den külemi tanga tayongzükbatem rongnung kaji, Aadhaar amshiba ajungkettsütsü asoshi lir,” ta ashi.

Kasa sentong nung Ministry of Electronic and Information Technology (MeitY)  Secretary, Aruna Sundararajan-i, “Tang mezüng Indianung temelenshiji agent ana lir- sorkar aser regulator lir,” ta ashi.

Laisa, “Onoki transfers (subsidy) ajakji digital Direct Benefit Transfer (DBT) payments ajanga yoktsü,” ta ashi.

CDFI tenzüker küm ana jungogo, aser iba mapang ya sorkar indang Jan Dhan scheme den külemi lir. Iba ya Bill & Melinda Gates Foundation (BMGF) aser Tata Trusts densema tangartemi yarir.

Deputy Director BMGF, Daniel Radcliffe-ia, financial inclusuion atema digitalised system amenokba nung Asia aser Africa nung aliba linüktem rongnung India ya mezüngpur lir, ta ashi.

“Linük aika dang nungi India tejaklen lir. India-i alima dang financial inclusion indang sayutsü ta onoki amanger,” ta Radcliffe-i ashi.

Tamalen IT & Law Minister, Ravi Shankar Prasad-i, “Asenoki 2015 census den medemdangra tanübo Aadhaar card agi tain nütsüng shilem 98 ayimjemogo. Ano nisung crore 32-ibo parnok bank accounts ji Aadhaar den sentaktepogo,” ta metetdakja liasü.

Taküm January nung World Bank osang ka ajanga ashiba agi, India nung schemes ajak atema Centre aser state tem napronglai Aadhaar amshira  ibaji ajanga küm nung sen crore 70,000 shi kümzüktsü.