Aadhaar enrolment crore 111 jungogo, sen crore 36,144 kümzükogo: Ravi

New Delhi, January 27 (Agencies): Republic Day nü tashi nung Aadhaar atema tenüng züluoker crore 111 jungogo, aser ibaji ajanga küm ana tsüngda centre aser state senpong nung sen crore 36,144 kümzükogo, ta Hokolbarnü New Delhi nung IT Minister, Ravi Shankar Prasad-i metetdaktsü.
Item sen kümzükbaji sorkar indang Pahal scheme ajanga sorochiokba gas cylinders atema consumers` accounts nung sen indangindanga inoktsüba agi lir, aser ibaji Aadhaar den sentaktepa lir, ta paisa ashi.
Pahal scheme ajanga 2014-15 küm sorkari sen crore 14,672 kümzüka liasü aser 2015-16 küm sen crore 6,912 kümzük.
Minister-i, “Aadhaar crore 111 jungogo. Terenlok nung ajak dendaktsüba maparen nung iba ya alizüng ka tongtetba lir. Küm trok ser tesadang nung aika tongtetogo,” ta ashi.
Aadhaar enrolment ecosystem nung registrars 135 aser enrolment agency 612-i working enrolment stations 47,192 nung anogoshia lakh 7-8 tenüng züluoker mesüra update sütsür, ta paisa ashi.
Aadhaar nung aliba nija miim osangtem kümzüka mali ta aikati arendaka bilemba dak sentakba nung Prasad-i, “Nija osangtem aser database security atema sorkari inyaker, aser iba atemaji onoki nendaka inyakdar. Asenok, Aadhaar Act 2016 lir, koba ajanga nija osangtem kümzüka ayutsü asoshi ozüngtem lateta lir,” ta ashi.