Aadhaar number online ajanga lemsatepdang kümdangtsüla: UIDAI

New Delhi, Metsüremi 17 (Agencies): UIDAI-i linük nüburtem dang internet nung service balala atema Aadhaar osang lemsatepdang kanga kümdangtsüla, ta metetdaktsü.
Google search ajanga Mera Aadhaar, Meri Pehchan atema metetpeladang Aadhaar osang prok ta aitsüba dak sendakba nung UIDAI-i, ibaji Aadhaar aser database security den kecha sendaktepa mali, ta ashi.
“Nisungtemi internet nung Aadhaar densema pei nija osangtem nisung kar mesüra service provider den lemsateper. Internet nung pei nija osangtem agutsüdang digital activities dak sendakba nung kanga kümdangtsüla,” ta Unique Identification Authority of India (UIDAI)-i sangdong ka ajanga metetdaktsü.
Tanga identity documents den kasa Aadhaar jia miima yutetba document ka masü, ta shia UIDAI-i mobile number, bank account number, PAN card, passport ama nija osangtem kümzüka ayutsü atema metetdaktsü.
“Nisung kari temelaba makai nisung kar indang Aadhaar card, mobile number, bank account, photograph ama nija osangtem lemsatepra nija ka temeten anema inyakba atema pa anema ken o benoktsü,” ta UIDAI-i metetdaktsü.
Aadhaar indang osangtem third party websites nung angutsü aser Google search ajanga nisung aika indang Aadhaar osangtem angutsü, ta aitsüba dak sendakba nung UIDAI-i iba sangdong agutsür.