Aadhaar nüngtem nung sorkari teyari magutsür: Priyanka

New Delhi, March 09 (Agencies): Tanü Congress Party-i, Modi’er sorkari Aadhaar card ajak ket nung akatsüla ta latetba ajanga sensaker tetsürtem, tanurtem aser tangartem nem welfare schemes magutsür, ta aitsü.
New Delhi nung osangbenertem den jembidang Congress otongdar, Priyanka Chaturvedi-i, “Onoki iba ya Ato kilonser, Narendra Modi dang asüngdangner- nai ajak jungtepa alitsü aser tanurtem chiyungtsü peria manguba indang jembir, süra kechiba Aadhaar compulsoruy kümtsüba ajanga nai welfare schemes nokdanger?,” ta asüngdang.
Lai ashiba agi, Congress-i maneni Modi sorkar dang ICDS, mid-day meal aser lendong nung asürtem nem teyari agutsüba ama welfare schemes atema Aadhaar compulsory asütsü lemtetbaji agienang ta mepiogo.
Congress Party lenir Chaturvedi-isa, iba telemtetba ajanga tongtibang welfare schemes ji tagidak maka akumtsü aser item scheme nungi tajangzük angutsüpurtem kongshitsü, ta ashi.
Bhopal Gas lendong nung takoksa angurtem nem senotsü agutsütsü atema-a Aadhaar card nüngdaktsü, aser iba dak sentakba nung lai ashiba agi, “Iba ya taochi maketba aser bendangshidanga amshiba lir. Supreme Court-i, sensotemi social schemes teyari angutsü atema telatetbaji Aadhaar kija masütsüla ta shiogo.”
“Item ama schemes atema Modi sorkari budget ajema kümner ta onoki angateter, ajisüaka parnoki ibaji mesangdongteter, ibayongji parnoki Aadhaar card compulsory kümtsütsü telemtetba agi,” ta laisa aitsü.
Laisa, Modi-i par sorkari sensakertem atema teyari mapa balala inyakba indang onük talanglang jembir, saka Aadhaar nüngtem nung parnoki tangbo social schemes magutsütsü atema inyaker, ta aitsü.