Aadhaar onük nung SC obendangji takok tulu: Congress

New Delhi, Rongjui/Sept. 26 (Agencies): Aadhaar onük nung Supreme Court-i agutsüba obendangji takok tulu, ta shia Congress-i, iba obendang ajanga Modi sorkari “surveillance tool” amshia tim mesüi tashi amshiba anentsü, ta ashi.
Tanü Supreme Court-i, Aadhaar tenüng amer surveillance agiba anentsü atema obendang agutsü.
Tanü New Delhi nung aliba AICC office nung osangbenertem den jembidang Congress lenir, Kapil Sibal-i, SC obendang ajanga UPA-i Aadhaar atema mangdang yua aliba pusemer, ta ashi.
Paisa, joko mobile phones aser bank accounts atema Aadhaar mamshitsü, ta ashi.
Congress lenirisa, iba obendang ajanga Lok Sabha Speaker-i telemtetba agibatemji judicial-i reprangshitettsü ta kuli sayur, ta ashi.
Sibal-i, Supreme Court nung judge pezüi Aadhaar Act ji money bill ama agizüker, saka Justice D.Y. Chandrachud-i ibaji magizükteti, ibaji ajanga democratic inyakyim raksatsür, ta ashi.
Justice Chandrachud-isa, sorkari item ama inyakyim nung bills agizükba ajanga Parliament aser MP tem teinyaktsü shilem ajema kümdaktsür, ta shiogo, ta pai ashi.
“Sorkari money bill lenmang ajanga iba Act yanglushitsü merangbaji Congress-i magizüktettsü aser court nung ken o benoktsü,” ta pai ashi.
Tesülen Congress-i sangdong ka ajanga, “Sorkari Aadhaar ya tajangzük agutsütsü atema hadir ka ama masü saka tim mesüi tashiyim amshia public dang nung data bendentsü aser surveillance agitsü atema amshir,” ta aitsü.
Supreme Court-i obendang ka ajanga Aadhaar document agizük, saka onük kar melenshitsü. SC-i, Aadhaar ji bank accounts lapoktsü atema memeshitsü, school nung admission atema mesüra mobile phone connections atema memeshitsüla, ta obendang agütsü.