Aadhaar osangtem kümzüka dang lir: UIDAI

New Delhi, March 05 (Agencies): Unique Identification Authority of India (UIDAI)-i, Aadhaar biometrics nung osangtem tim mesüi amshia maitsü auyaba mesüra senotsü nung takoksa anguba tatalokba mali, ta metetdaktsü.
Iba dak alia Aadhaar aser subsidy transfers sendaktepba ajanga tesüiba küm ana ser tesadang tsüngda linük senpong nung sen crore 49,000 kümzükogo.
Unique Identification Authority of India (UIDAI)-i ashiba agi, tesüiba küm pongu nung Aadhaar authenticated transactions crore 400 dak tema süogo, ajisüaka Aadhaar biometrics tim mesüi amshiba ajanga maitsü auyaba mesüra senotsü nung takoksa anguba tatalokbatem mali.
UIDAI-isa, Aadhaar indang UIDAI database tim mesüi amshiba mali aser UIDAI ket nung aliba nijatem osangtemji kümzüka dang ayur, ta ashi.
“Tanüasüng inyakyim den medemdangra Aadhaar-authentication ji kümzüka lir. Biometric tim mesüi maitsü auyaba nokdangtsü aser iba anema inyaktettsüsa Aadhaar system dak tashi lir,” ta UIDAI-i ashi.
Osangkakettem nung biometrics tim mesüi amshiba osang prokba dak sentakba nung UIDAI-i, ibaji bank ka indang Business Correspondent company nung inyaker kati pa indang biometrics tim mesüi amshitsü merangdangba tatalokba ka dang lir, aser ibaji by UIDAI internal security system ajanga puteta Aadhaar Act kübok tim teinyaktsü inyakogo, ta jangjatsü.