Aadhar card ajak ket nung alitsüji temzüng ka masü: SC

New Delhi, August 11 (Agencies): Mongolbar nü Supreme Court-i, Aadhar card ajak ket nung alitsüji sensotem asoshi temzüng ka masü, ta metetdaktsüogo.
Supreme Court, Constitution Bench kati Centre sorkari dang iba telemtetbaji nüburtem dang sangdongtsüla ta tuyuogo.
“Aadhar card ajak ket nung alitsü ya temzüng ka masü ta Centre-i osangkaket aser electronic media ajanga nüburtem dang sangdongtsü,” ta SC bench-i ashi.
Linük senso ajak nem Aadhar card agütsütsü asoshi Centre-i benokba sentong anema aser nija temeten ya kanga dang nüngdakba temeten ka asü ta benokba temepishiba onüktem SC-i angadanga liasü.
Tanep SC bench kati iba onük ya Constitution bench ka nem nunglokja liasü.
Constitution Bench-isa, PDS aser LPG distribution system dak alaka sorkar indang welfare scheme balala angutsü atema Aadhar card ji ‘optional’ ka asütsü, ta ashi.
Court-isa, “Aadhar card holder tem indang nija osangtemji ketdangsertemi melemsateptsüla,” ta shiogo.
Aji oda süaka temzüng alema aibelenba ken o balala bushisüngdangba mapang nungbo Aadhar card holder tem indang temetettsütemji amshitsü melatsü, ta SC-isa shisem.