Aadhar Card nung sen crore 5,000 bo intokogo: Centre

New Delhi, July 21 (Agencies): Tanü Centre sorkari Supreme Court dang, parnoki tang tashi nung Aadhar Programme nung sen crore 5,000 bo intokogo aser joko iba ya atitsü makok, ta metetdaktsüogo.

Tanü Attorney General Mukul Rohatgi-i court dang, iba programme ya titemra ibaji ajanga welfare scheme balala nung mejungi kongshitsü aser linük nung sensak tia anema sorkari raratsü merangba nung tamakok alutsü, ta ashi.

Linük nung nütsüng crore 120 shi aliba nungi nütsüng crore 80 shi Aadhar asoshi tenüng züluokogo, ta pai metetdaktsü.

Attorney General-isa court dang, iba onük ya obendanger züngsem pongui akümba constitution bench ka nung benokang, kechiyong iba nung ta Linük Temzüng onüktem densema lir, ta mepishiogo.

Unique Identification Authority ajanga process asüba Aadhar number ya sorkar service ajak asoshi nüngdaka kümogo. Ration cards nung tenzüker bank accounts, voter ID cards aser LPG subsidy angutsü asoshi nüngdaka kümogo.

2013 Sept. ita nung Supreme Court-i, Aadhar card ya public service balala asoshi nüngdak ka masütsüla ta shia liasü.

Yaküm March ita nung court-i sorkar dang, kechiba Aadhaar card ya tang tashi kibong akümtsü, pei akaba oset register asütsü mesüra gas connection atema sensotem asoshi nüngdak ka kümdaktsür, ta asüngdanga liasü.