Aam Aadmi Party-i constituency ajak nungi tokteptsü

Dimapur, December 19 (TYO): Aam Aadmi Party (AAP) Nagaland state unit-i sangküm state general election nung assembly constituency 60 prongla nungi tokteptsü telemtetba agiogo.
Iba osang ya AAP, Political Affairs Committee (PAC), züngsem Sanjay Singh-i metetdaktsü.
Central lennirtemi iba telemtetba mulunga agizükogo. Menden ajak nungi metoktepra, AAP-i sorkar tajung ka mekümtettsü, ta pai ashi.
AAP ya meimchir renlokba aser ajaklen terenlok atema alizüng yur mapa inyakba yimten telok ka lir. Onoki Nagaland nung alirtem dak temulung alemer aser maongka dang agüja onok nem Nagaland nung taruba sorkar kümdaktsüra, Nagaland nungi ochimashi agientsü, ta Sanjay Singh-isa metetdaktsü.
Nagaland nung tanü khuret aika ajurua lir. Lenmang mesüra shisaluyimba mesüra power amala ajaklen khuret lir. AAP-i item khuret ajak party election manifesto nung enoksemtsü, ta paisa shisem.
AAP, PAC züngsem Ashutosh-ia o jembidang ashiba agi, Nagaland nung alirtemi ochimashi sorkar agientsü mapang ka tonga aruogo.
“Onok yangi yimsüsürtem ama aruba masü saka temelenshi bener arutsü atema aru. Nagaland nung alirtemi tanga sorkar ka akümtsü mulunga agizüktsü ta onoki imlar” ta paisa shisem.
AAP-i tetemjen candidate tem aser tenüng tajung aliba nübotem toktepdaktsütsü. Onoki shimba nisungtemji yimtenren den sendaktepa alirtem masütsü akok saka tenüng tajung alirtem asütsü, ta Ashutosh-is ashi.
AAP, Nagaland convenor, Dr. S. Amos-i anir züngsem 5 agi akümba search committee ka tentetogo.