Aamir Khan aser Oprah Winfrey na mesükteper : Ava DuVernay

Mumbai, November 8 (Agencies) : Academy Award atema nominate süa aliba director Ava DuVernay-i Aamir Khan-i inyakba mapa sakloker aser pa Oprah Winfrey den medemdanga jembiogo.
“Ni Aamir Khan indang mapa aika nguogo. Ni Big B (Amitabh Bachchan) amala nüngtugu nisungtem indang osang aika angazükogo aser America nungeri nüngtugu nisung aika memetet” ta Ava-i osangbener dang ashi.
“Ni Aamir meimer. Pa dak nisung puatsü sempet lir aser pai tesüngmangtsü keta lokti atema mapa inyaker. Ano pa indang ‘Satyamev Jayate’ television sentong kanga junger” ta laisa ashi.
Ava-isa Aamir ji Oprah Winfrey den medemdanga jembi.
“Pai Oprah Winfrey mesük. Sentong nung lokti atema awareness aika benoka agir. Anungji ni iba mesükba mapa inyakertem ajak akhümtsübur” ta Ava-i ashi.
Mumbai nung 17 buba MAMI film festival nung Ava ya International Jury nung densema liasü.
Laisa Vidya Balan, Kangana Ranuat, Shabana Azmi aser Kiran Rao nunger den “Women In Films” olemtep nung shilem agia liasü.
“Ni yangi Vidya den ajurutepa metettep. Ni la den tesentaktep telti alitsü imlar. La den medemer dang masü saka künübo la den külemi inyaksemtsü ni imla atar” ta Ava-isa metetdaktsü.