Aamir Khan dak maoktsütsü atema website ka lapoka lir

November 30, 2015: Bollywood actor Aamir Khan aser pa kinüngtsü Kiran Rao nati linük nung akhümtsübutep mali ta jembiba sülen ashishitep tulu adoka liasü, aser Shiv Sena-ibo Aamir dak shibai maoktsütetdir sen lakh 1 senpet agütsütsü ta sangdongogo.

Maneni tang Miami Ad School nung kaketshir kari nai Aamir dak maoktsütettsü atema website ka lapokogo.

Iba website tenüngji ‘Slapaamir.com’. lir. Iba website nungji teka ka adoktsü, koba ajanga website amshirtemi Aamir Khan noksa nung maoktsütsü akoker. Iba dak alia Aamir tejak nung maoktsüba shia pa tejakji melenshir.

Iba website osang angashia karibo asayamenu atema lapoker aser social media nung karibo ibaji kanga aitsüdar.

Iba website yanglurtem jagisa, “Slapaamir.com ya asayamenü aser purapitetba atema dang lir aser iba nung densema alirtem ya yimtenren tangatetba ajanga masü. Onok asayamenü atema aremzükang,” ta zülua lir.a