Aamir Khan’er jalai ‘Dangal’ film ajungkettsür

New Delhi, December 13 (Agencies) : Aamir Khan-i tongti shilem agiba Dangal film indang anogo azüngtsü tenzükogo aser film tasenba ya Aamir’er jalai ajungkettsüogo.
Aamir aser taoba kinungtsü Reena Dutta na jala Ira Khan-i yimjak nung ‘Dangal’ film ajungkettsü aser ibaji Ira aser lar medemertemi ‘Bapu sehat ke liye tu to haanikaarak hai’ ta züluba T-shirt tem asemba liasü.
Noksatemji arishi küm 51 tain Aamir-i Mongulbarnü pa indang Twitter account nung sayua liasü.
Dangal film nung Aamir-i melangteper Mahaveer Singh Phogat indang jilu ia shilem agir. Mahaveer-i par jala ana Geeta aser Babita na takok anguba melangtepertem akümtsü atema sayuteter.
2010 Commonwealth Games nung Geeta-i gold aser Babita-i silver sempettem angu. India tsür melangtepertem rongnung takok angurtemji tena mezüng lir.
Iba film asoshi Aamir Khan-i Mahaveer Phogat mesüka akümtsü atema pa temang melenshidakja liasü. Aamir-i ita pungu tsüngda pa temang touzük nung seret 25 ajema kümdakja liasü.
Aamir Khan-i tang ‘Dangal’ film ajungkettsü atema tesem balala nung shilem agia senzür. Pai taruba director Karan Johar indang sentong ‘Koffee With Karan Season 5’ nung shilem agitsü aser iba mapang pa den Dangal nung par jalatem- actress Fatima Sana Sheikh aser actress Sanya Malhotra na adentsü.
Dangal nung Fatima-i Geeta ama aser Sanya-i Babita Phogat ama shilem agir.
Dangal ya Nitesh Tiwari-i direct asü aser TV actress Sakshi Tanwar-ia Mahaveer kinungtsü ama shilem agir. Iba film ya December 23, 2016 nü sayatsü sentong lir.