Aamir, Rajkumar Hirani nungeri Script contest tendangtsü

Mumbai, October 18 (Agencies): Actor Aamir Khan, director Rajkumar Hirani, screen writers Juhi Chaturvedi aser Anjum Rajabali nungeri script tetoktepba tendangtsü.
Parnoki Cinestaan India’s Storytellers Script Contest tendangtsü. Iba tetoktepba ya Cinestaan Digital Pvt Ltd.-i ayongzükba lir. Iba tetoktepba nung script tajungtiba nem senpet sen lakh 25 aser tanga senpet tem ajak senteper sen lakh 50 agütsütsü, ta sentong ayongertemi sangdong ka ajanga metetdaktsü.
Iba tetoktepba nung script tajungtiba karbo Cinestaan Script Bank atema shimtettsü, koba studio aser production house temi reprangtettsü aser iba sülen tezülurtem den maparen balala atema sendakteptettsü.
Aamir-i ashiba agi, iba ajanga otsü zülurtem nem kanga teyari agütsütsü.
“Linük nung sempet tajung aketba nisungtem aika lir ta ni amanger. Ajisüaka item nisungtem Indian film industry atongtsü asoshi tetsükdaktsü kanga adoker. Otsü zülur tajungtem nem maongka aikabo magütsür, ta bilemer,” ta pai ashi.
Jury chairperson Rajabali-i ashiba agi, “Iba amala sentong ka atema ataa liasü. India nung screenwriting jenjang tajungba ka dangi aniba iba ajanga sayur. India cinema-i script tajung nüngdaker aser iba tetoktepba ajanga iba nükjidong ajangtettsü asoshi anasaba anir aotsü.”
Iba tetoktepba ya ajaka atema lir aser 2018 January ita 15 nü tashi tenüng züngoksemtettsü. Tetoktepertemi script agütsübatem tetendangertemi asadangtsü aser result ji taruba küm agütsütsü.