AAMSU-i NRC ketdangsertem anema lungkak ait

Assam kübok Lakhimpur nung AAMSU-i Deputy Commissioner indang office kima lungkak aitdang agiba noksa angur. 

Guwahati, August 9 (Agencies): National Register of Citizens (NRC) ketdangsertemi Assam nung telok tilaba nung züngsemtem timtemdaktsüba atema tejashi sayua All Assam Minority Students’ Union (AAMSU)-i tanü state ajungalen lungkak aitba sentongtem ayonga agiogo.
Ketdangsertemi telok tilaba nung züngsemtem dang ghonda 48 tsüngda NRC kuli agütsütsü atema osangtem sangoktsü, ta AAMSU-i aitsür.
Upper Assam nung NRC hearing centres-i aodang gari lendong nung asür kibong shia nem NRC ketdangpurtemi sen lakh 10 aser yirur nem sen lakh 5 teyari agütsütsüla ta parnokisa takhangba agütsü.
“Supreme Court indang Standard Operating Procedure (SOP) nung alima ama NRC ketdangpurtemi anogo 15 jelia notice agütsütsüla. Pei talidak toktsür kilometres 300/400 meta pilaa oa alidak kuli agütsütsü atema jaokba inyakyim ya anentsüla” ta AAMSU-isa metetdaktsü.
Lower Assam kübok Kamrup, Goalpara, Barpeta, Baksa, Chirang, Bongaigaon aser Nalbari district tem nung alir nem osang tasen sangoktsüogo aser iba nung parnoki Upper Assam kübok Golaghat, Sivasagar, Chairaideo aser Jorhat district temi aotsü tetuyuba agütsü, ta parnokisa ashi.
Assam Legislative Assembly-i NRC dak sendakba olen kar jembiba August 8, 2019 nü Supreme Court-i agientsüogo aser parnoki (SC) August 31, 2019 tashi nung NRC maparen tembangtsü mapang latettsüba ama inyaktsü shiogo.
“Onoki tetuyuba agütsüba aser obendang agütsüba anema jembiba atema onoki shisamebulur. August 31 nü tembangtsü lateta aliba ama onoki NRC maparen ketdangsüa reprangtsü” ta Chief Justice of India Ranjan Gogoi-i ashi.