AAP advertise senji Modi süoshi sen dang nungi tajemba: Kejriwal

Panaji (Goa), June 30 (Agencies): AAP sorkar indang advertising budget ji  tesüiba küm ana nung Ato kilonser, Narendra Modi-i pa süoshi nung intokba sen dang nungi tajemba lir, ta tanü Delhi Chief Minister, Arvind Kejriwal-i ashi.
Kejriwal-i ashiba agi, Modi-i kodanga süoshi ka anaben masemer aser süoshi shiaji sen lakh ana lir.
Goa yimtiba, Panaji nung yimobilem zülurtem den senden amendang AAP tongti, Kejriwal-i, “Onoki advertise nung sen crore 526 intoker ta kari jembiogo. Khenyongi tai. Onoki advertisement nung sen crore 76 intokogo. Delhi sorkar kübok department ajak nungi sen intokbaji Modi süoshi jenjang dang nungi tajemba,” ta metetdaktsü.
“Ni ongkoji sayudi. Modi-i asemba süoshi kaji sen lakh ana jenjang lir. Pai anogo nung süoshi ponguben melentepa asemer, ibaji anogo nungbo sen lakh 10 asütsü. Pai kodanga süoshi tanaben masemer, süoshi mashier aser tanaben masemer,” ta paisa ashi.
“Kuli tejangjabaji ya lir. Google nung ‘Modi’ ta ajenang aser images column nung nai noksa balala ana nung kasa süoshi kodanga mangutsü. Ibaji anogoshia sen lakh 10 adoker. Pa sorkar tashi nung anogo 700 jungogo, iba tetezü pai süoshi kija nung sen crore 70 intokogo. Pa indang tanga süoshitem nung ano sen crore pongu tali asütsü,” ta paisa ashi.