AAP-i Goa nung aliba casino tem nokdangtettsü: Kejriwal

Panaji, November 06 (Agencies): Delhi Chief Minister Arvind Kejriwal-i, Goa nung aliba casino tem AAP-i ang nokdangtettsü aser Congress-i taruba election nung tashi ita shilem magitettsü, ta video sangdong ka ajanga metetdaktsü.
Goa nunger voter tem dang minute 17 video sangdong ajanga Delhi sorkari mohalla clinic tem lapokba, sorkar school tem tajungba küma ajungketba aser tanga infrastructure tem renlokdaktsüba metetdaktsüdang, Kejriwal-i 2017 Goa assembly election nung AAP nem vote agütsütsü shisem.
“Goa nung alir ajaki casino tem shibangdaktsüner. BJP aser Congress napronglai ibaji meinyaktet, kechiba süra parnok lenirtem item casino tem den tesendaktep lir. Anungji AAP-i ang iba mapaji inyaktettsü. AAP-i Goa libaliro raksaba nungi kümzüktettsü,” ta You Tube sangdong ka ajanga Kejriwal-i ashi.
Kejriwal-i, taruba election nung Congress mali amai bilemang, kechiyong parnok nüngdak mali amai kümogo aser parnok nem vote agütsüba ajanga vote lemdangtsü, koba ajanga BJP ang ajangzüktsü, ta Goa nung voter tem dang ashi.
“Yimlibilema vote telemdang. Congress joko ojang. Iba tetoktepba nung Congress maden. Kari Congress nem aser kari AAP nem vote agütsüba ajanga vote lemdangatoktsü aser BJP-i tanaben yimsü asütsü,” ta pai ashi.
Aam Aadmi Party nung Co-Convenor-i, Manohar Parrikar-i aniba BJP-i state kanga ashioktsüogo, ta ashi.
“Ajaki AAP nem vote agütsütsüla aser BJP nem vote agütsüner dang ni ya asüngdangner: BJP-i nü nem kecha agütsü asü magütsü ? BJP-i mohalla clinic lapoktsü asü ? BJP-i education system tajung agütsü mesüra junga yimsü asür asü ? BJP-i teraksa ang bener arutsü. Anungji BJP nem vote tagütsü,” ta pai ashi.
Congress dang nungia BJP ji anasü agi tamajungba aser Manohar-i nüburtem ashioktsüogo, ta paisa ashi.