AAP-i moko advertise masütsü ajungshir

New Delhi, March 02 (Agencies): Aam Aadmi Party sorkari Bollywood actor pezü- Ajay Devgn, Shah Rukh Khan, Arbaaz Khan aser Govinda nunger kinüngtsürtem dang shidi ajanga, moko chiyungtsütem advertise mesüdaktsüner, kechiyong item chiyungtsü nung cancer tashitak adokba agent lir, ta ashi.

Tamalena Delhi health Department-i item actor tem dang moko chiyungtsütem advertise masütsü ajungshia liasü, saka parnoki telangzüba magütsüba ajanga tanbo parnok kinüngtsürtem dangi ang iba temepishiba shidi züluogo.

Shah Rukh Khan kinüngtsü Gauri Khan dangi züluba shidi nungji, “Nüburtem anema-alibaren atema tebilemtsü kaa nai nü kinüngbu Shah Rukh Khan dang pan masala advertisement nung shilem magitsü ajungshidaktsünüa zülur,” ta shia lir.

Kasa shidi nung, “Tamalena shidi ka ajanga Shah Rukh Khan dang nübur atema item ama advertisement nung shilem magitsü ajungshiogo. Ajisüaka onoki (Delhi sorkar) tanü tashi telangzüba kecha mangu, iba den külemi pai maneni item ama advertisement nung shilem agir,” ta zülua lir.

Iba ama kasa shidiji Ajay Devgan kinüngtsü Kajol, Arbaaz Khan kinüngtsü Malaika Arora Khan aser Govinda kinüngtsü Sunita Ahuja nunger dangia züluogo.

Kasa shidi nung, pan masala nung moko mesüra nicotine maliyonga supari bo lir, aser tangbo supari nunga cancer agent aliba kuli lir, ta zülua lir.

Tamalena item ama shidiji actress Sunny Leone dangia zülua liasü.