AAP-i par MP tem dang parnoki inyaktetba osang meshir

New Delhi, July 07 (Agencies): Aadmi Party (AAP) Punjab state unit nung party inyakyim nung mepelai MP asemi benoka jembiba sülen AAP-i par MP tem dang tesüiba küm ka nung parnoki inyaktetba osang meshiogo.
Patiala nungi party MP Dharamvira Gandhi-i ashiba agi, AAP Punjab observer aser senior party lenir Sanjay Singh-i SMS ka ajanga pai inyaktetbatem osang meshiogo.
“Tanü 12.47 ako meta SMS ka ajanga Sanjay Singh-i, onük asem nung pary tongti-i osang meshir ta ashi. Mezüngbuba onükji Parliament nung onoki nüburtem asoshi tasüngdangba kwi benok. Tanabuba nung ozü constituency nung party aintsü asoshi nenoki kechi inyakteta liasü. Tasembuba nung, ozü constituency nung mapa koba tashi ka inyak (?) ta osang meshiogo,” ta Gandhi-i ashi.
“Onok dang iba telangzübaji taruba anogo pongunü tsüngda agüjang ta shiogo, aser ibaji inyaktsü asoshi onok mapang peria lir,” ta paisa ashi.
Patiala MP Dharmvira Gandhi’er kidang Gandhi den MP Sadhu Singh aser Harinder Singh Khalsa nunger senden ka mena liasü.
State party-i Delhi party unit ama akümtsü nükjidong yur meranga inyaker. Taküm Delhi assembly election nung party-i menden 67 tashi nung takok nguteta liasü.
Taoba hopta nunga state party-i parnok mapatong tasen kar sangdonga liasü.
Party-i zonal level nung observer aser coordinator 13 shim aser party tera ayangtsü asoshi wing aika tenteta liasü.