AAP-i Rijiju mapa nungi anenang ta akhanger

New Delhi, December 13 (Agencies) : Mongulbarnü Aam Aadmi Party (AAP)-i Union Minister of State for Home Affairs, Kiren Rijiju pa mapa nungi anentsüla, ta takhangba agütsüogo.
Parnoki ashiba agi, Rijiju ya Arunachal Pradesh nung tang teinyakdak aliba hydro project nung tim masüba maparen kar nung densema lir.
AAP lenir Ashish Khetan-i, “Rijiju-i Minister tashi amshia par adianu ka sen crore 450 ochi meshii amshiba nung yarir,” ta ashiba osangkakettem ajanga metetdaktsüogo.
“Ya kanga junga bilemdangtsü mapa ka lir. Iba ama ochi mashi inyakyim inyakba sülen Rijiju joko kilonser menden nung amentsü temeten mali. Pai pa mapa nungi tangsa tang anenatoktsüla,” ta Khetan-i ashi.
AAP lenirisa Ato Kilonser Narendra Modi dang iba ochi mashi inyakyim nung bushisüngdang asütsü ozüng agütsütsüla ta ashi.
“Onoki Ato Kilonser dang iba bushisüngdang nung Rijiju aser par kinungertemi teka maittettsüsa inyaktsü mepishir,” ta pai ashi.
Arunachal Pradesh nung 600MW Kameng Hydro Electric Project atema dam ana yangluba contractor tem nem sen agütsütsü atema Rijiju-i shidi züluogo, ta osangkaket ajanga sangdogogo.
Power project nung ochi mashi inyakba tiyazü osangprokba atema Mongulbar anepdang Rijiju-i osangkakettem aitsüogo aser pai, “Ni aitsürtem Arunachal Pradesh-i arunungbo tsüngsem agi ajemsatsü,” ta ashi.