AAP MLA tem tepuokdaki yokba atema tai taka : Arvind Kejriwal

New Delhi, July 12 (Agencies) : 2003 küm taoba Gujarat home minister, Haren Pandya kahsetba ama tia tamajung majuruba atema kanga pelar, ta Delhi Chief Minister Arvind Kejriwal-i metetdaktsü.

Hombar nikongtsütsü Babarpur nung Eid-Milan sentong ka nung jembidang Kejriwal-i ashiba agi, “nisung kari pa dang na tia taka kechiyong nür MLA tem tepuokdak dang ayr ta ashi.”

“Nisung kati kü dang, ‘Kejriwal na kanga tia taka’ ta ashi aser ni kechiba ta asüngdangdang, ‘nabo tepuokdaki dang yoker, aji ta mesüra Gujurat nungbo parnoki Haren Pandya tepsetba ama na tepsettsü’ ta langzü” ta Aam Aadmi Party tanishir Kejriwal-i metetdaktsü.

Prime Minister Narendra Modi aser BJP-i Delhi sorkar tetsükdaktsü ajurudaktsütsü atema AAP MLA ajak tepuokdak ayutsü meranger, ta paisa tai tongloktsü.

“Pai Delhi sorkar tamakok ngudaktsütsü meranger. Ketdangser tajung ajak Delhi nungi mapa belenogo. Parnoki ozü MLA tem tepuokdak ayur. Asenoki Bhagat Singh aser Subhash Chandra Bose nati nüjiso atema inyakba bilemtettsüla. Tang ya tanabuba nüjiso atema rara lir aser MLA tem ajaki tepuokdak aotsü mulunga lir” ta Kejriwal-isa ashi.

“Ni Gujurat-i ao aser idakji ni Rajkot nungi Somnath tashi kilometer 200 senzü. Ni semdangba mapang lenmang anatsülen nisungtem noktaketepa liasü aser parnoki ashiba agi item nisungtemi (BJP) Gujarat raksatsüogo” ta paisa shisem.

“Delhi nung electricity bill units 400 atema sen 1,100 dang agir saka Gujarat nungbo sen 2,200 agir. Gujarat nung school aser mozükitem tia kanga mejungi lir. Nisungtemi laktetogo aser Gujarat nung AAP sorkar arutsü atema parnoki yongyar. Goa nunga nübortemi AAP atema renema lir aser tawa bushitetba osang ka ajanga Punjab nung menden 117 nungi AAP-i menden 100 tashi takok angutsü ta bushitet” ta Delhi chief minister-isa metetdaktsü.