AAP MLA temi kü dak azük: Mishra

New Delhi, May 31 (Agencies): Tanü Delhi Assembly nung tawa minister menden nung anentsüsang, Kapil Mishra kima anizüka yutsü, iba sülen Mishra-i, assembly nung AAP MLA temi pa dak azük, ta metetdaktsü.
Mishra ya AAP MLA aser Delhi Water Minister liasü, ajisüaka pai AAP tongti lenir, Arvind Kejriwal nem ochimashi tai tongloktsüba sülen pa party nungi anentsü.
Tanü assembly nung pai Chief Minister Arvind Kejriwal anema ochimashi onüktem ozülu nung amer longkak aitba sülen AAP MLA kar külen, aser pa külen ser teka itepa liasü.
Madan Lal aser Jarnail Singh na densema AAP MLA temi Mishra nungshia-atsüshitsü, iba sülen Speaker, Ram Niwas Goel-i pa kimai anizüktsütsü atema tetuyuba agütsü.
Tesülen Goel-i senden minute 15 thinena liasü. Iba senden ya state GST bill agizüktsü atema ayongba senden liasü.
Osangbenertem den jembidang Mishra-i, “O jembitsü atema kü nem temelaba magütsü. Ni o jembitsü merangdang AAP MLA pongui kü dak azük tenzük. Tang mezüng House telung nung MLA temi melung masür ka tebang nembangtsütsü merangogo,” ta aitsü.
Mishra-isa, “Item tatalokba ajunga ya Deputy Chief Minister, Manish Sisodia asalentong lir; pa tetuyuba kübok MLA temi kü tsüngdangi aru,” ta ashi.
May ita tetenzüklen Kapil Mishra-i, Chief Minister, Kejriwal-i health Minister, Satyendra Jain ket nungi sen crore 2 agiogo, ta tai tonglokja liasü.
Mishra minister menden nungi anentsüba sülen anogo ka lir pai, “Jain-i Kejriwal nem par kidang sen crore 2 agütsüba ni nguogo,” ta sangdonga liasü.